中美貿易高級別談判在即，市場觀望氣氛轉濃。恒指近幾日都係早段市況較波動，午後就冇聲冇氣。以昨日為例，全日高低波幅210點，收市跌210點報25,682點，主板成交754億元，睇個勢似係大戶想撐住個市，但又撐唔住咁款！
此外，近期有個較值得留意的現象，就係避險股冇乜避險功能之餘，資金撐市幾乎淨係押注落內銀股身上，就連作為中資金融股一員的內險股，睇落都唔多對路，更加唔好講香港業務比重較重的板塊，咁係咪暗示港股仲有排衰，經濟遲遲都未見底？
講真，多個國際評級機構先後下調香港主權信貸評級及前景，加上作為貼地的香港人，相信大家都睇得到現時「衣、食、住、行」四大方面都受影響，簡單地好似港鐵（00066）連車站都閂埋，咁小市民點出街食飯同買衫？住方面，樓市前景就更加唔使講，除一手樓較硬淨外，二手樓市錄得愈來愈多的大幅減價個案，以及部分舊樓重建區的放售價開始回軟，多少反映樓市投資者對後市取態。
所以話，港鐵與領展（00823）近期反覆下跌正正反映了投資者心水有幾清。前者大股東雖為政府，但管理質素有目共睹，加上無論鐵路項目收入，還是物業發展項目收入前景都唔樂觀；至於後者，就算話旗下商場多為民生消費為主，但整體樓市及租金下調趨勢開始，加上以往變賣商場等招數不再，估值難免被市場重估，所以都係博唔過。
內銀股方面，即使近期股價叫做硬淨，但一來唔知貿易談判係咪真係有好消息；二來在人民幣貶值趨勢難以逆轉，影響實際收入；三來內銀作為百業之母，經濟增長放緩，自然盈收大受影響。加上近幾日股價似乎係撐住居多，而一向行得最慢的中行（03988）昨日跑贏建行（00939）及工行（01398），單單這點就已經睇唔通啦！轉個頭睇，如果貿易談判有好消息，投資氣氛改善，都應該直接炒內地券商股，而非內銀股啦！
古勝