Market Insight:港交所併購自討苦吃

長假期間香港社會動盪不安如處煉獄,可假後港股復市,好似冇咩大事發生過咁,恒指一度升359點,收報25,893點,升72點,成交831億元。齋睇港股,完全感受唔到香港社會經濟實況,呢件確係世界奇聞!

點解會咁?皆因回歸逾22年,人心雖尚未回歸,但港股卻已早已回歸,由內地資金揸莊。中資企業佔了逾半壁江山,今時今日外資投行不少以華人管理層主導,就連研究報告都對敏感題目留有一手,免得罪大客戶。港股與A股表現愈來愈相似,外資難再興風作浪!

香港經濟唔好,但股市都唔使點跌,理論上對於揸住股票資產的人又冇咩唔好!可實際上港股表現與現實脫軌,長線資金難以評估風險與回報,結果選擇離場。指數有反地心吸力,但交投一潭死水,股市作為企業融資的功能褪色,呢啲誠然都唔係好事。

內地金融業將更開放

老古識唔少有銀士,都話唔會坐困愁城,索性全身投入內地市場找商機。好似昔日經常從香港搭飛機去傾生意的,如今就選擇過深圳乘坐飛機,勝在唔怕去唔到機場或者航班取消。香港百業蕭條,市民不願消費,香港業務只有收縮,部分改以加注神州市場,敬候中美達成貿易協議,金融服務業進一步開放。如是者,香港獨特價值光環漸失,社會事件總會成過去,結果還是要融入大灣區發展。如果這就是香港的宿命,香港人是否也得面對現實,好好為未來的日子籌謀。

講番個股,昨日魚缸之星,當然係隻香港交易所(00388),九月中旬提親倫敦證券交易所被拒,仍死口唔會放棄繼續追求,對家索性吊高嚟賣逼「癡人」放手。結果港交所昨日正式宣布棄購,小股東聽到當然高興,皆因唔使再擔心畀人鋸到一頸血,股權被大幅攤薄,故見港交所 股價反彈2%,收報231.2元。

不過,今次事件反映港交所在配合中國發展方面的策略是過於急進求成,未有審時度勢,管治策略上誠然失分。再睇依家香港經濟真係沒有最差只有更差,港股等如被廢掉三成武功,未來能否止跌回升,全看中國經濟。

與其係咁,何不直接買A股ETF又或者中資股,少睇港股指數相關產品或港企股份。畢竟投資只有贏或輸,沒有對或錯。若然認為神州市場買不落手,就只有轉戰海外,或安分守己揸現金或黃金,靜候雨過天青。

古勝