唔好以為美團點評（03690）淨係做送外賣！繼今年初進軍共享單車業務，設立美團單車後，佢哋最近開發招聘平台，唔只幫人搵食，仲搵埋工添！
美團官方話呢個仲喺測試階段嘅平台叫做「饅頭直聘」，嗱！唔好畀個名呃到，呢個平台覆蓋嘅行業有好多，包括餐飲、酒店、娛樂、結婚等應有盡有，絕對唔係淨係得飲食業。
事實上，「饅頭直聘」係一個「藍領」招聘平台，專請啲做勞動工作嘅員工。呢個平台主要係同內地嘅中小企商戶合作，幫佢哋解決難請人嘅問題，而且個平台使用好方便，求職者可以透過美團、大眾點評App同「饅頭直聘」微信專頁搵工。重點係美團本身同好多商戶都有合作，相信會比其他招聘平台有更多工作選擇！
咁啱高盛尋日發表報告，調高美團嘅目標價，由85元調高14.7%至97.5元，維持「買入」評級。受到呢個消息刺激，美團昨收報75.4元，升4.7%。
余絲韻