絲絲講場：王玉麟新官上任晒幸福

之前喺財務及職業諮詢機構美世（Mercer）任職健康福利及強積金業務部總經理嘅王玉麟（Billy），原來過檔咗去強積金顧問公司駿隆，尋日係佢第一日返工，即日就同記者見面。見佢成個人容光煥發、Fit咗唔少，原來佢啱啱放完個悠長暑假。

Billy呢個假期一放就放咗兩個月，佢同絲絲講，喺舊公司都做咗成四年，想換吓新環境，喺七月離職嘅時候，其實新工作嘅安排都未完全落實晒o架。

講到呢兩個月多出咁多時間，究竟點使呢？Billy個樣即刻甜絲絲，話老婆要返工唔得閒，佢就變身「湊囡公」，一個人帶住三個囡囡去日本自駕遊，可以同三個前世情人日夜相處，唔怪得甜到漏啦！

余絲韻