絲絲講場：微軟蓋茨公開致富秘訣

將六成資產買股票

佢接受彭博電視訪問時，透露自己採取財富管理方式並非保守，即唔係「現金為王」，反而係：「將超過60%資產買股票」。

雖然蓋茨嘅慈善捐款金額已超過350億美元（約2,730億港元），但截至周一止，今年以來佢嘅淨資產依然增加170億美元，佢副身家淨值達1,060億美元，喺彭博億萬富豪指數中，僅次亞馬遜創辦人貝索斯嘅1,130億美元，屈居第二。

而令蓋茨財富持續增長嘅秘訣，正正如佢所言，就係買股票！據了解，佢現時嘅財富中，就擁有約600億美元（約4,680億港元）嘅股票資產。

睇好能源儲存行業

咁佢又有咩投資建議呢？佢話現時係從風能同太陽能行業，轉移到需要更多技術嘅新興產業之上，所以佢就睇好能源儲存同埋海上風電等行業，仲話呢類型公司股價目前非常便宜。

依家美國監管機構想將美國巨型科網股拆骨，解決壟斷市場行為。蓋茨話：「你必須諗清楚，拆骨係咪最好嘅方法？如果你想剷除公司壟斷行為，你應該禁止呢啲行為。但如果分拆成兩間公司，只會有兩間公司同時做壞事。」

余絲韻