港股周三先跌後回升，惟全日恒指波幅不到300點，都係反覆整固為主，冇咩微言大義。藍籌股中，醫藥股繼續獨領風騷，中國生物製藥（01177）及石藥集團（01093）都是升幅榜前列。之不過，炒家亦要留意，現時非大旺市，短炒有胡唔食罪大惡極。
除了醫藥股，大眾消費品股亦有資金追捧，好似昨日見日清食品（01475）、華潤啤酒（00291）、安踏體育（02020）、李寧（02331）、海底撈（06862）股價均做好，其中後四者股價即市均創52周新高。不過，跟炒呢類股，都係集中人氣旺的幾隻大晒士股炒，千祈咪諗住搵細價股炒落後，皆因批大價股都隨時話回就回，細價股不但未必跟炒仲可能會跌得更甘；二來熱炒大晒士股流動性較高，有咩依郁都叫有得走，細價股成交少買又唔買得多沽又要檻價沽，真係少做少錯唔做唔錯。
吉利汽車（00175）公布業績，上半年純利約40.09億元人民幣，按年倒退近四成，不派中期息。老實講，業績失色，並不意外，整個內地汽車業如今都水深火熱，強如吉汽亦不會有例外。針對汽車業的處境，一則面對內地經濟景氣轉差，奢侈品需求下降，致令銷情慘淡。二來內地降低外資車廠的入場門檻，意味本地車企競爭加大。小弟預期，明年內地經濟增長可能會降至6%以下，汽車銷售前景將更低迷，估值壓力不言而喻，故撈底實非其時。
另一隻公布業績的藍籌股乃中華煤氣（00003），半年純利跌逾18%至38.89億元，中期息每股12仙。業績指上半年本港餐飲業銷售同比下跌，加上本港平均氣溫較去年同期高出較多，影響煤氣銷售。難怪股價在績後沽壓湧現，唔見半成。
雖然，收息一族見中期息得以維持，好似冇咩好驚，但始終公司盈利倒退，若趨勢持續，未來全年派息或紅股能否維持，不無變數。當一向被視為避險的個股都開始不太避險，正是股市進入熊市的又一現象，各位好自為之。
古勝