過往證券經紀日進斗金，可惜如今時移世易。有資深股票經紀表示，網上買賣股票及進取的中資券商崛起，股票經紀已淪為「雞肋」，一個月僅賺數千元大有人在，與過去一年「閒閒地」賺數十萬元甚至過百萬元不可同日而語，「好話唔好聽，做個看更好過。」
資深經紀琪哥表示，有聽聞一些經紀收入慘淡到不足以繳交公司的成本費，即是「白做」。
中美貿易戰持續升級，港股首當其衝，但他直言：「冇得擔心啦，呢行根本末日咗，你依家幾可會有人打電話畀經紀買股票？尤其係年輕一代都揀網上做！傳統熟客冇一個就少一個，十月開始（香港證監會）實施收緊證券行孖展借貸新指引之後，連孖展客都冇埋！」
他又表示，以前行業全盛時期，例如一九九七年亞洲金融風暴前，整天電話接個不停，但銀行殺入證券買賣後就開始沒落，到網上買賣興起，簡直是「冚埋個棺材蓋」。證券行為節省開支先是搬離中環，到現在靠程式節省人手。
另一名資深經紀星哥亦指出，現時仍然透過經紀買股票的投資者，可能都是「上咗年紀嘅人」，「有時會同個經紀傾吓偈，你個囡點呀？你個仔點呀？結咗婚未呀？生意靠呢種聯繫維持。」在經紀行全盛時期，一年收入能夠應付八、九年營運開支，「一個月閒閒地搵幾十萬，如果同個客熟收貴啲，都冇問題。」不過，現時「客唔多嘅經紀月入五位數都好勉強，一般四位數字，叫做吊命囉，但你做開呢行好難轉。」
他又表示，經紀行節流方法已經不多，開源多數靠推廣新的衍生產品，教育客戶對沖風險，但較複雜的衍生產品，客戶未必有心學習，始終股票一買一賣是最快捷。