一如預期，港股升抵26,300點水平遇阻整固，依昨日（周二）的市況看，短線回吐壓力並非太大，故後市仍有機會再上，且別過早開淡倉。藍籌股中，周一提及的石藥集團（01093）股價對辦，重上14元樓上，短線穿唔到14.5元的話可以先食一轉。
手機設備股亦有好表現，舜宇光學（02382）股價重上100元樓上後未見回吐，而弱勢的瑞聲科技（02018）亦能跟上，有勢敲40元關。不過，始終論基本因素，舜宇係高瑞聲幾班，而瑞聲又始終未脫弱勢。所以若然短線跟炒，建議都係集中搞舜宇，唔好貪平。
大摩將今年香港GDP增長預測下調至負0.3%，並指下半年恒指可能要見21,500點，最熊預測則為17,600點。愈升愈叫買，愈跌愈一沉百踩，一向係大行作風，所以睇到呢啲大行評論，一點不意外，反而覺得有啲嚟遲了。
好多時大家都唔想變，就自然會找一萬個理由去批評要變的人。不過，只管防守而不變，又係咪等於可以等到出路呢？老古日日坐喺魚缸面前，見盡呢幾年小經紀死守慘況，白坐一日喺行冇單開早已成為常態，啲客輸吓輸吓，就連即日鮮都好似絕迹咁，經紀自己炒交數，唔少都輸到心淡轉行。一個經紀行業差到咁，交易所大員大大聲講香港新股市場有幾勁幾威水，有幾多幾多中企來港上市，So what？這幾年無論係小經紀抑或小投資者，都唔見得可以從港股發展中得到多大益處。反而，中企新股上市後不斷插水，成為一個又一個坑錢的洞，就係鐵一般的事實。
雖然早兩日老古睇勢話港交所（00388）短線有反彈動力，惟中長線仲係未敢太樂觀。尤其係全球對於投資中國概念的取態有變化，中企的投資價值已非昔日般吸引。如果真係睇好中國概念，索性揸中金公司（03908）或者內地龍頭券商股仲直接可取。
古勝