仲有一個月鬆啲，做咗兩屆香港金融管理局總裁嘅陳德霖就會退下火線，臨別秋波，佢特地喺《匯思》撰文，回顧自己喺九一年五月，由外匯基金管理局開始返工嘅「金管之路」，仲統計自己寫咗70篇《匯思》，儲儲埋埋有成15萬字，奈何成日畀同事「提點」文章太長！
一個央行行長邊有咁多時間寫文吖？原來佢大部分文章都喺公幹嘅長途機上面起草，之後再搵同事幫手整理一吓、對吓數，把握時間喎。佢話好想喺離任之前，用當事人第一身所經歷，同市民重述過往發生嘅金融大事，增加大家嘅現場感。
化身講古佬嘅陳德霖，第一篇就係話說當年喺滙豐銀行「收番」個央行港元結算權，不過文章發表之前都仲係再溫提大家：「長文慎入」呀！
佢解釋番，基於歷史原因，滙豐一直係香港銀行體系嘅結算機構，有「半央行」之稱，之不過，港府覺得由一家商業銀行去承擔香港嘅央行功能，始終唔係長久之策，於是喺八八年引進「新會計安排」，用間接方法去限制滙豐左右貨幣供應嘅能力。睇番第一篇主要係回顧香港支付結算系統嘅前世今生，唔知下一篇又會講咩呢？
余絲韻