絲絲講場：國產豬肉大王搶攻人造肉
萬洲國際（00288）旗下、全球規模最大嘅生豬生產商同豬肉供應商，美國史密斯菲爾德食品公司（Smithfield）宣布進軍人造肉領域，產品最先會喺美國Kroger、Target同Sprouts Farmers Market等零售巨頭嘅門店開售。
明年美五千超市開賣
該公司首席商務官John Pauley話，佢哋已經觀察人造肉市場多時，並計劃明年二月，公司嘅人造肉產品將會喺北美地區五千間零售超市有得賣。
佢仲話，公司嘅人造肉產品品牌名為「Pure Farmland」，係以大豆蛋白為原料，採用嘅人造肉技術係植物蛋白肉，即係利用植物蛋白原料，主要係大豆蛋白、小麥蛋白、豌豆蛋白等，添加由酵母合成嘅植物性血紅蛋白嚟製作。至於產品系列就包括人造肉漢堡、肉丸、香腸同碎肉等。
事實上，自今年五月以來，隨着美國「人造肉第一股」Beyond Meat上市，人造肉概念全球爆升。Beyond Meat喺納指首日掛牌收市即勁升1.63倍，之後股價長升長有，曾創下239.71美元嘅歷史高位，較招股價25美元勁升8.58倍；近日股價先跌番少少，周一收報144.51美元，上市至今仍然累升4.78倍。
萬洲股價年內漲10%
無論如何，人造肉股概念橫空出世後，身為國產豬肉股王嘅萬洲國際亦有受惠，今年以來股價累升10.78%，周二收報6.68港元。
余絲韻