絲絲講場:輪王翁世權帶囝囝睇奇迹

財金界人士今個暑假親子旅行會去邊度?好似瑞萬通博香港上市產品銷售部主管、「輪王」翁世權(Simon)夫婦同10歲囝囝一家三口咁,揀咗去南美洲國家秘魯玩番半個月,而行程最特別嘅係專程去咗當地位列世界七大奇迹之一嘅馬丘比丘(Machu Picchu)。

遊馬丘比丘 回歸基本

Simon話馬丘比丘係佢一直都好想去嘅地方嚟,今次順便帶囝囝見識吓、體驗吓當地嘅印加民族文化。結果,阿仔都覺得短短兩日一夜喺馬丘比丘嘅體驗好得意,比起平時帶佢去主題樂園嘅感受好唔同。

馬丘比丘係印加帝國遺迹,屬於高海拔地區,所以喺嗰度網絡通訊都無咁方便,成日收唔到信號。所以無論自己定囝囝嗰幾日都玩少咗電話,亦唔使Check住有冇Message,感覺生活簡單啲咁話。

因為冇得玩電話,囝囝選擇同當地小朋友踢吓波、交流吓,好快就適應到。

Simon仲話,返嚟香港後會用番今次體驗提醒阿仔,唔一定得電子產品先提供到娛樂,基本嘅遊戲,如踢波咁,做吓運動都唔錯。

余絲韻