內地手機品牌酷派集團（02369），停牌超過兩年後，終於喺上個月下旬復牌。近日酷派終於傳來消息，九月會喺內地推出新手機測試市場反應，之後仲會部署明年喺印度推出首部5G手機。
絲絲記得酷派手機（Coolpad）當年旗下主打性價比嘅品牌「大神」，受歡迎程度唔會輸畀小米，只係大神家陣已易手，唔係酷派旗下。
經歷過同賈躍亭旗下嘅樂視手機合併失敗風波後，公司上個月復牌當日股價曾暴跌61%，最終收市報0.385元，跌46%。而酷派尋日股價亦隨大市跌，收報0.265元，跌8.6%，較復牌當日再跌逾31%。
不過，最新消息話，酷派九月將會喺內地發布全新智能手機，未來更會深耕印度市場。講真，酷派喺○七年就有喺印度賣開手機，啱啱六月先喺當地推出新機Cool 3 Plus，售價只係133美元咋。
酷派復出就剛好食正5G時代來臨，公司表示，依家已獲批120項5G端對端技術專利，準備明年會喺印度推出首部5G智能手機，而且更加係印度首家推出5G手機嘅廠商添！
余絲韻