絲絲講場：股王成功靠馬化騰「苦幹」
「成功需苦幹」呢句套用喺騰訊控股（00700）主席馬化騰到就最啱！唔好以為作為「股王」主席好輕鬆，過去一年佢勤力到嚇死人，日以繼夜不停咁工作。有內媒爆料話，其實由舊年秋天騰訊宣布內部架構大調整，瞓身去開拓B2B（企業對企業）業務後，馬化騰真係做到索晒氣。
據講馬化騰經常搭即日飛機公幹，出咗機場，就直接去現場傾生意同簽約，有時仲係坐完飛機傾完生意，又要去參加一啲推唔甩嘅晚宴，食完飯後再坐回程飛機歸家。不過，騰訊內部員工透露，正因為老闆咁搏，好多原先會無咗嘅生意機會，都畀佢搶返嚟。
凌晨兩點照覆E-mail
馬化騰曾經講過，舊年係騰訊「危機感很強的一年」。佢堅決要做好B2B業務，所以經常都冇覺好瞓。有一次，公司電腦程式員深夜趕一份PowerPoint，完成後Send畀馬化騰嗰時已經凌晨兩點，點知沖完涼約20分鐘後準備瞓覺時，馬化騰已經回覆咗修改意見。
老闆都勤力成咁，如今騰訊由上到下，節奏快得驚人。原來昔日嘅馬化騰係少說話，多做事嘅人，但家陣，員工們覺得佢愈嚟愈健談外，仲成日四圍去各大Event站台，曝光率爆升！
余絲韻