港股近期氣氛差就係人都知，但從投資市場反應及角度看來，美國突然宣布將對中國商品加徵關稅，其影響力就明顯大過美國聯儲局，話今次減息並不代表已進入減息周期之不明朗因素。何解？
大家睇睇上周五環球股市大插，避險資產卻全線大升，美匯指數彈到上98.45的同時，金價則高見1,461美元，美國十年期國債孳息率更跌到落1.833厘，為一六年十月以來低位。美元與金價齊齊上升過往相對少見，通常都係環球有大事件發生前夕先會發生，加上美債息亦回，正正反映整個投資市場避險需求其實好高。
若然此趨勢短期未變，相信作為外向型經濟的港股都唔會有運行，且就算有反彈，都要小心係死貓彈後無運行。
睇番恒指上周五裂口低開後無力反彈，最終跌647點或2.3%，收報26,918點，失守所有長中短線平均線，並與六月四日低位26,671點相距僅247點；國指則跌272點或2.5%，收報10,348點，走勢同樣衰到爆，主板成交更增至1,142億元配合跌勢。
值得注意的是，上周五拖累恒指跌幅最多達115點的，就係早前好威風的騰訊（00700），單日跌3.8%報355.8元，失守中期升軌支持。
可見，從外圍不明朗因素，以至香港內部政治不穩因素，已對香港經濟及港股造成影響，實際影響難以估算，但投資氣氛好差已不用懷疑，起碼見大大小小金融機構內部員工氣氛都受影響。
最重要的是，人民幣上星期的貶值勢頭，會唔會一直延續落去，人民幣難保七以及內地經濟增長難保六下，港股又點會唔被拖累？在風頭火勢下，大家都係短期增持現金，因港股劣勢似乎唔會咁快平息，留得青山在，不怕沒柴燒。
古勝