Market Insight：慎防內銀賺息蝕價
環球經濟大阿哥美國，周四凌晨一如預期減息0.25厘，本來投資市場都唔當係一回事，但最慘係聯儲局主席鮑威爾話今次減息只是「調節」，並非減息周期的開始，故直接增加未來美息走向的不明朗性，港股周四再跌212點報27,565點，失守250日牛熊分界線，主板成交增至799億元，淡風已成！
金礦股仍值得留意
事實上，正如古勝早前所言，強如領展（00823）、港鐵（00066）都要從高位掉頭回落，再睇埋一眾防守力最強的公用股如中電（00002）、香港中華煤氣（00003）及電能實業（00006）都要級級落，就知道今次唔係板塊強弱互換咁簡單，而是有資金撤退趨勢。
當然，有人話金礦股都回啦，你睇睇招金礦業（01818）、紫金礦業（02899）及山東黃金（01787）跌3至6%不等！但大家要明白，今轉金礦股回軟，主要係因為美元轉強，美匯指數彈到上98.8水平，並間接拖累以美元計價的金價，從1,437美元急跌至昨日執筆時的1,416美元。考慮到美元息口前景未明，故只要金價後市未跌穿1,400美元關，金礦股在環球風高浪急下，仍值得逢低收集，事關美匯從基本面睇，似乎再升空間有限。
另一邊廂金融股全線散水格。滙控（00005）昨收報63.05元，已失守前低位支持63.15元；友邦（01299）收報79.7元，兩者走勢均唔多樂觀。一向穩打穩紮的內銀股都唔威得幾多，建行（00939）、工行（01398）、農行（01288）、交行（03328）及中行（03988）全線破位而落，短期爬唔番上去，又係瓜多過菜，賺息蝕價。
簡而言之，在多個板塊都開始失守下，就算買中隻騰訊（00700），但後市可以撐幾耐冇人知，最恐怖係，若騰訊都開始要下跌時，會唔會出現整個港股人踩人的慘況真係冇人知！
古勝