大企業掌舵人到底具備邊幾項特徵？專才招聘公司Robert Half研究顯示，涵蓋恒生綜合大型股指數112家企業中，男性掌舵人數目仍然係佔盡上風，而高學歷、具工商管理經驗，仲有國際工作經驗，正正係攀上事業高峰嘅入場門檻，你又中幾多項先？
研究就話，入得上述大企業做CEO，平均年齡為57歲，最年輕一位只有40歲，最年長嘅就91歲，當中有超過九成係男性，只有5位係女性，難怪今時今日，社會唔少聲音投訴女性管理層比例太低！
高等教育學歷當然係致勝關鍵，一眾CEO有超過八成擁有學士學位，近七成擁有研究生學位，四分之一已完成工商管理碩士課程，有部分人甚至擁有超過一個研究生學位。
工作方面，有工商管理經驗嘅CEO，如果熟悉會計、財務、市場推廣、銷售、營運及人力資源範疇，自然特別有優勢。如果曾擔任財務職位，更有助了解公司財政狀況，以獨到眼光洞察業務情況。
然而，Robert Half香港副總監林綺玲就話，隨着自動化技術進步、數碼轉型、監管框架及全球化發展等，企業對CEO嘅要求只會愈來愈高。各位打工仔如果真係想攀上高峰，係時候自我增值喇！
余絲韻