Market Insight：高檔品牌股遇寒風

正如之前所言，港股橫行上落多時，但恒指波幅指數反覆上升，暗示短期內爆邊機會增加，昨日恒指其實都幾靠騰訊（00700）撐一撐，唔係指數點會跌得咁少。

相反，早前講過一定要睇實的領展（00823）及港鐵（00066）股價分別跌2.7%及3.1%，前者失守多條主要平均線，MACD熊叉擴闊，圓頂之勢明顯，走勢利淡之餘，更無視美國本周將會減息的利好消息，有貨宜沽出，未有貨的則不宜手多多。

以守為攻 減磅為主

至於港鐵本來有政府作為大股東又有穩定收入，有乜負面消息都冇有怕，但如今市場氣氛轉差，未來會唔會發展成「要錢唔要貨」的機會不能抹殺，昨日不幸中的大幸是尾市跌幅收窄至3.1%報52.1元，但若然港股氣氛繼續差落去，相信強如騰訊屆時都要腳仔軟，咁港鐵又憑乜可以企硬？所以都一樣係逢高減磅。

策略上建議以守為攻，減磅為主，但沽貨都要有先後次序，在政治事件影響下，某類板塊就一定要先沽為敬！好似港人近期都盡花心神去討論政治事件，唔好講話股市難炒，就連商場生意都少咗好多（消費意欲冇乜嘛！），且多國發出旅遊警示下，旅客消費自然下降，故對做零售生意的企業影響就最大。

當中，又以做貴價生意的零售股就最慘，事關有錢客何時何地都消費得起，又何必走入「戰區」消費，所以見六福（00590）、周大福（01929）及周生生（00116）股價近期都慘不忍睹，昨日跌幅3至5%不等，走勢差到爆！

入市要先睇外圍氣氛

此外，好似領展這類業務收入穩定的REITs，其實最好用來打防守，惟基金價格之前升得太盡，且集團最吸金的「包裝資產再高價賣出」的法寶賣少見少，未來行內地買貨條水又未知行唔行得通，不過遇着投資胃納進一步下降，股價已經冇運行，昨日跌2.7%報92.35元，為去年十一月以來首次跌穿100日線，圓頂下跌趨勢明顯，都係先避為妙。

最後，散戶如果已經冇貨在手，就算有意入場，都係建議等埋美國及英國本周四公布議息結果，以及周五美國公布一系列就業數據，再睇睇市場氣氛先至好謀定後動，事關就算外圍氣氛好轉，都唔代表港股有運行！

古勝