香港輪證（窩輪及牛熊證）市場又再熱鬧番，事關大行摩根士丹利相隔差唔多十年，再度踏足本地輪證市場，佢哋首批八隻恒指牛熊證（牛證同熊證各四隻）將會喺下個禮拜一掛牌買賣，令依家輪證發行商數目增加到13間。
聽聞佢哋產品嘅發行商中文簡稱叫做「摩利」。
據悉，大摩年前已經聘請咗稱得上係「第一代輪后」嘅黃惠恩（Venus）「坐鎮」，擔任香港上市結構性產品銷售部主管，而佢之前做過大和同比聯嘅輪證部門，經驗豐富。
然而，近年監管同系統要求愈嚟愈高，一間金融機構不論係由零開始，又或者重新建立輪枱都唔容易，大摩籌備進軍輪證市場都花咗一至兩年時間。今次試水溫之後，相信佢哋會逐步增加產品數目，包括推出窩輪。
有新發行商加入好定唔好呢？絲絲問過瑞信香港認股證及牛熊證銷售主管何啟聰（Ivan），佢話近期港股交投轉趨淡靜，多多少少都令業界競爭進一步加劇。如果新參與者打價格戰，其他發行商嘅利潤就會被攤薄。佢估計扣除經營成本後，年初至今賺到錢嘅發行商唔多。
余絲韻