絲絲講場:證券學會一姐悶市遊俄國叉電

近排香港社會立立亂,大市又悶到抽筋,證券行生意淡靜。證券學會主席李細燕本身係大埔區青年網絡副主席,因利乘便,下個月中將會帶領大埔區青年網絡嘅一班中學生去俄羅斯交流,趁機出門行開一陣,輕鬆吓兼叉吓電。

李細燕:要吸正能量

李細燕坦言,社會近排咁多示威活動,大家心情都受到影響,依啲日子最好就係出吓門,吸收吓正能量,放假輕鬆一吓。

據絲絲所知,李細燕一向有服務大埔區內青少年,而佢將會喺下個月十一至十九日,同一班後生仔女去莫斯科同聖彼得堡,參觀當地企業同與當地大學交流等等。

細行難捱 部分想執

絲絲仲八到,今次一行人有成十幾二十人,李細燕仲出任副團長添!佢話,雖然呢個只係一個交流團,但自己都好大責任(口架),不過,都有校長同埋老師陪同,可以分工合作,先至無咁驚。

今時今日個社會成日談論年輕人,李細燕都話希望可以藉住同班後生一齊交流,增加同佢哋嘅溝通同了解。

講番個股市,李細燕話,日日得番五、六百億元成交,好多細證券行真係經營得幾辛苦,有啲行的確唔想再經營落去,有啲就想觀望多一陣。

佢坦言,股市有好多風浪佢都經歷過,每次都危中有機,但係今次個股市牛皮悶局,真係好難先至可以突破現時嘅困局?佢話都想知可以有乜良方妙藥喎!

余絲韻