絲絲講場：上深創板三隻松鼠敲鐘
中港新股上市儀式通常都會安排公司高管敲吓鐘，或者敲吓鑼。之不過，尋日深圳創業板就開創咗一項A股先河，敲鐘嘅唔係人類，而係三隻松鼠仔！
股價曾飆44% 帶挈創辦人發達
講緊嘅係賣堅果類零食起家，被稱為「零食界小米」嘅知名內地電商三只松鼠（300783.SZ），公司尋日喺深圳創業板首掛，發行價14.68元（人民幣‧下同），開市即高開報17.62元，較發行價升20%，之後冇耐就爆上44%後漲停板收市，收報21.14元，市值升近85億元。有趣嘅係，創辦人章燎源放棄敲鐘，改由公司吉祥物，即係三隻松鼠仔上台代勞，現場十分歡樂。
公司嘅股價雖然節節上升，但換手率僅0.13%，擺明投資者認為仍未升夠啦。而章燎源合共持有公司44.5%股份，持股數1.74億股。按照昨收市價計算，佢副身家已經超過36億元。
三只松鼠喺一二年成立，由當初5人到依家5,000人，由淘寶店到成為上市公司。公司嘅產品現覆蓋堅果、乾果、花茶同零食等12大產品類別，平均每年售出堅果1.9億袋。章燎源就話，計劃將今次IPO籌得嘅6億元，部分會用喺主要二、三線城市開設100家門店咁話。
余絲韻