Market Insight：成交縮炒股唔炒市

不過，有一點要留意，就係香港政治氣氛持續不穩，難免打擊投資者信心，好似市場近期熱話就係部分外資大行選擇撤離香港，其實有關因素亦對港股成交有影響。當然，大家可以繼續選擇炒股唔炒市，但不得不防，若然成交持續低迷，屆時可能連個股都好難炒，起碼能夠有成交配合升勢的股份才有得玩！

勝在街貨少 易炒上

講番仲值得炒的板塊，當中有筆者不時推介，又真係見到持續硬淨的物管股。無他，板塊基本面一來受貿易戰影響較微，二來輕資產受人民幣貶值影響同樣較小，三來近期可以炒得上又能夠維持升勢的板塊買少見少，咁資金見板塊有鑊氣，自然排住隊押注。

最後，就係物管股雖然估值愈來愈唔平，但另一邊又確有業績支持，好似永升生活服務（01995）昨日發盈喜股價抽上就威到盡！昨日股價一支大陽燭抽上，單日升15%報4.04元，成交增至4,173萬元配合升勢，走勢靚絕。

此股在一八年十二月上市，若翻查資料，主席林中等相關人士現合共持有68%股權，再數埋花紙有逾七成在頭四大市場參與者手上，可見街貨都好乾，如果要再挾上其實唔難，但建議散戶押注都係小注怡情為上，目標價睇4.6元，跌穿昨日低位3.68元則要堅決止蝕。

碧桂園服務相對穩陣

若要揀相對穩陣之選，則可選碧桂園服務（06098），昨日成交1.4億元，以這個板塊來講真係好多，加上受惠母公司碧桂園（02007）樓盤陸續交付，管理面積可持續增加，有利估值提升，股價近期在17.5至19元水平整固，建議候低吸納，博整固一輪後重新上路。

另外，無論美國減息速度如何，在經濟前景不穩及美長債息回落的大前提下，在港上市的公用收息股應該續有運行，大家睇睇港鐵（00066）真係氣都唔使抖又再重新上路，完全無視沙中線等多個負面醜聞。

從估值睇，集團往績市盈率20倍，息率2.2%又唔算好吸引，不過勝在穩打穩紮，加上七月十六日就派息，增加資金在派息後進一步增持的誘因。

策略上，既然該股股價拾級而上，有貨咪繼續持有放長線釣大魚，最多跌穿20日線約51.7元止蝕；至於未有貨者，則可等到貼近52元水平的低吸機會，目標價57元，止蝕位51元。

古勝