絲絲講場：森信紙業CEO為兒徵女友

事關集團行政總裁李誠仁個仔今年21歲，依家仲喺瑞士讀緊大學，主修酒店管理。佢就講到明唔擔心阿仔日後做咩工，只要佢開心、自在就得，但為人父親，就好緊張個仔嘅感情事啦！眼見會上傳媒過半都係女性，佢就趁機幫阿仔徵友，仲笑言「有合適未婚女性，可以介紹吓」。

集團續拓非紙品貿易

點解咁緊張個仔嘅感情生活？佢就大嘆，時代唔同咗，女兒嫁咗比較有娘家心，分分鐘賺半個仔（女婿）；但兒子娶老婆就會聽晒老婆話，無咗個仔，所以希望第時個仔娶老婆，聽老婆話之餘仲記得佢同媽媽喎！

至於會唔會請阿仔畢業後「加盟」？李誠仁就耍手擰頭話唔好喎，佢喺公司咁多年，好清楚知道一間公司需要專業化管理，如果夾硬要阿仔加入公司，而佢志不在此，會不利公司發展，「佢做share holder（股東）就夠啦」！

講番業務，公司近年開拓消費用品批發及物業開發業務，李誠仁就期望，兩至三年內，非紙品貿易業務佔公司收入比例由現時約11%增至50%，同紙品業務睇齊。

余絲韻