絲絲講場：Dyson創辦人星洲買樓破盡紀錄

絲絲收到風，話英國家電生產商Dyson嘅創辦人戴森（James Dyson），斥資7,380萬新加坡元（約4.23億港元），買入新加坡最高嘅豪宅頂層複式單位，成交價仲打破咗當地同類單位紀錄！唔知間屋入面所有家電，會唔會換晒做Dyson呢？

據外媒報道話，戴森今次買嘅係新加坡最高豪宅地標華利世家（Wallich Residence）嘅62至64樓單位，坐擁中央商業區景觀。由於戴森同老婆都係當地嘅永久居民，可以慳番外國人買樓嘅額外稅項添。

講番呢幢豪宅地標，華利世家樓高290米，第39至64樓係住宅，所有單位都喺海拔180米以上，物業舊年曾經嚟過香港做展銷添。而戴森斥逾4億元買下嘅豪宅面積超過2.1萬平方呎，私人泳池、按摩浴室、藏酒室等一應俱全。

要數新加坡上一宗高價豪宅成交，不得不提位於烏節路購物區旁嘅Boulevard Vue，上個月有頂層複式單位，以5,200萬新加坡元（約2.98億港元）售出。至於Facebook聯合創辦人薩韋里林（Eduardo Saverin）亦曾經用咗6,000萬新加坡元（約3.44億港元）喺當地置業。

老實講，近年新加坡都幾吸引全球富豪到當地買樓，包括阿里巴巴創始人之一嘅孫彤宇，使成5,100萬新加坡元購入嘉峰豪庭（Le Nouvel Ardmore）單位；海底撈（06862）創始人張勇亦以2,700萬新加坡元（約1.55億港元）買咗一棟植物園附近洋房添。

余絲韻