絲絲講場：巴菲特多咗個股聖細佬？

平民驗光師身家達187億

驗光師Wertheim出身平民，17歲時學識炒股，第一隻股票係Lear Jet。依家身家高達24億美元（約187億港元），炒股心得就學晒股神嘅「買入後持有」！佢嘅財富源自蘋果公司、微軟，同港人比較陌生嘅Heico，喺招股嗰陣就掃入股份並持有至今，除咗呢3隻股票，佢亦重倉持有通用電氣（GE）、英國石油（BP）同美國銀行等。

據知，佢透過自己喺一九七一年創立嘅染色鏡片製造商BPI公司，不斷揼錢投資，再將公司每年投資回報約1,000萬美元，放番落股市。佢又話唔會太依賴企業嘅財務報告，反而每星期用十二個鐘睇企業嘅「知識資本」喎。唔止咁，佢仲有個理論：「當你喺每股13美元嘅價格睇中隻股票，就算每股跌到10美元，都應該繼續追捧。如果股價再跌，而你又睇好前景兼做足功課，就可增持。」

話就話無血緣關係，但Wertheim同巴菲特好似形影不離咁，更應股神邀請捐出大部分身家做慈善，睇嚟除咗炒股，連份善心都學到十足十。

余絲韻