Market Insight：金礦股吼位跟進

港股無水到，滬綜指亦反彈到3,000點邊就浮浮沉沉，無力感十足。反之，美股升且美長債息回落，反映環球資金有流入美國迹象。這亦難怪，環球各央行開始減息，未來經濟真係好極有個譜，咁究竟放水減息能否再次救到環球經濟，在這個後量寬年代，真係無水晶球都難以解答。

三大收息股各有賣點

不過，美債息回落，相對有利一批收息股，好似近期見港鐵（00066）、REITs如領展（00823）、香港中華煤氣（00003）等都愈升愈有，前者屢創新高，上周五高見54元；領展則繼續挑戰紅底價，周五高見99.8元；煤氣同樣拾級而上並創新高，即市高見17.98元。值得留意，上述三者業務雖然不同，但卻有共通點，就係業務收入穩定之餘，派息亦唔錯，故在這大風大浪又睇唔通後市的投資環境下，就最吸引好息之徒或穩陣派投資者。

從估值考慮，上述三者往績市盈率分別為20倍、10倍及32倍，息率分別為2.2厘、2.7厘及1.7厘，唔可以話好吸引，但三者各有潛在優點：港鐵隨着香港樓市愈升愈有，鐵路上蓋物業未來升值潛力非淺；領展潛力就在於重新翻新及包裝商場與車位，再高價賣出之變現能力；至於煤氣一來已壟斷市場，二來每年10送1紅股，股價卻能維持上升趨勢，揭示實際累升幅度比表面更大，增加長線投資者之持貨態度，間接有利支撐股價。策略上，三者股價皆有「古仔」支持股價走勢，大家不妨從中揀蟀，作為中線投資之選。

環球放水潮一觸即發

另外，歐洲央行行長將由國際貨幣基金組織（IMF）總裁拉加德接手，暗示歐央行未來有機會愈來愈鴿，部分投資者更認為歐央行年尾有機會再行量寬，難怪歐洲經濟一哥德國之十年期國債息都要跌到落負數，多少反映市場睇法。

可能有人會問，咁關港股乜事？大家不妨回想下，當年歐美因為甚麼要推行量寬（咪就係經濟衰到貼地），而到今年尾，大家又可能見到歐美齊齊減息甚至放水的畫面！而短期內又會唔會有新一輪更大範圍的貿易戰，甚至是貨幣戰？這對外向型經濟的港股，影響可謂不言之喻。

策略上，港股短期雖因中美貿易戰憂慮緩和而略有起色，但外圍經濟前景似乎唔多對路（都未計澳洲及新西蘭央行已先行減息）！考慮到金價近期守穩1,400美元，故值得吼實一批走勢唔錯的金礦股，作為防守之用。

紫金礦業（02899）股價早前呈圓底上升形態，短期受制3.3元頸線阻力，建議觀察3元承接力，吼位跟進博上破阻力後重新振作，目標睇前高位3.6元，跌穿2.9元止蝕。另外，山東黃金（01787）分別於今年二月、六月及七月初多次挑戰17元關不果，惟近期回至15元邊漸見支持，短期內若能在成交配合破位而上，相信再升空間唔細，可先放入觀察名單，伺機而動。

古勝