絲絲講場：股價撲千元人幣 茅台市值超中石油
賣茅台酒唔通好搵過賣石油？真係唔到內地股民唔信，A股「股王」貴州茅台（600519.SH）尋日股價直撲1,000元（人民幣‧下同）大關，最高見999.69元，收報987.1元，創上市以來收市新高，總市值更高達1.23萬億元，完美KO中國石油A股（601857.SH）嘅1.21萬億元。
豪派股息帶挈
茅台市值高過中石油都唔係冇道理，睇佢哋舊年業績就知啦，茅台單係毛利率超過90%呢個數據，又真係入多多油都好難追。雖然兩間公司都係Sell液體，但國內傳統汽車紛紛轉做新能源之際，偏偏內地同胞始終喜歡杯中物，外資又狂吸白酒股，所以兩隻A股近年嘅股價走勢一直有好大反差，唔係冇原因！
家陣茅台講明豪派股息，每股仲派成14.539元，搞到唔少股民趕喺呢兩日股權登記嘅最後限期（27日）前買貨等收息，更帶挈茅台股價千元目標指日可待。反觀中石油，近期股價曾創過上市以來收市低位6.88元不在話下，仲不時徘徊7元左右，令茅台股價比中石油貴足140倍之多！
余絲韻