絲絲講場：滙豐狂租共享辦公室
英國滙豐銀行將會成為美國共享辦公室公司WeWork嘅最大租戶之一，事關佢哋啱啱簽咗份長期租約，將會租用WeWork喺倫敦南岸廣場第二座（Two Southbank Place）嘅共享辦公室，總共有1,135張辦公枱，隨時創埋全球最大嘅共享辦公室空間紀錄。
員工返工彈性兼慳租
唔使好耐，將有逾千名獅子銀行嘅員工會喺呢度返工，認真大陣仗。其實唔止英國，喺北美同香港，滙豐都有租用共享辦公室工作。就好似香港咁，絲絲知道佢哋一直都有租開WeWork香港嘅共享辦公室，依家主要由旗下電子錢包Payme團隊佔用，尤其近排開始主攻商戶支付（P2M），佢哋仲一直增兵添。絲絲上去睇過，陣「Payme味」真係相當濃郁。至於其他喺嗰度返工嘅員工，就嚟自滙豐數碼化相關部門。
滙豐唔止慳到貴租，最重要嘅係共享空間緊貼其他商業新生代租客，尋求生意新Idea之外，亦可令員工返工更加彈性，唔使全部人都逼埋喺總行返工，可以話一舉幾得！至於今次逾千名英國員工大遷徙，就冇講到佢哋係屬於邊個部門喇。
唔講唔知，WeWork嘅共享辦公室已發展到全球超過400個地點，而其中四成租戶都係嚟自大公司，夠晒威水！
余絲韻