絲絲講場：AI搶飯碗會計師都要淘汰？
細細個就聽人講，大個咗最緊要係考個專業人士牌照，做嗰啲咩師就最有保障。之不過，隨住科技進步，加快投資行業嘅改革，有唔少原有嘅工種都將會被淘汰。吓！咁大件事？絲絲到依家都仲未成功考到喎！
13%人睇淡分析員前景
根據CFA（特許金融分析師）協會最新報告，訪問咗超過3,800名會員，當中近兩成受訪者認為未來五至十年會計師或者核數師會被淘汰。
另外，分別有約13%同10%嘅受訪者就覺得分析員（研究、投資、量化分析）同銷售代理（證券、商品、金融服務）都危危乎，會畀人淘汰咁話。
相反，差不多一半人就話要做到全球數一數二嘅投資專業人員必須擁有T-型技能（T-shaped skills），而所謂T-型行業專才，即係擁有特定領域嘅專業知識及廣泛嘅專業網絡、理解同觀點。
份報告更建議專業人士要更加精通科技，令人工智能（AI）同人類智慧（HI）互相合作，兩者平衡，先可以做到創新同為企業創造最大回報。
CFA考試增科技題目
而CFA作為業內人士公認嘅專業指標，當然唔執輸，亦將會喺一級同二級考試中加插科技應用嘅考試內容，早前CFA就講過會加入FinTech（金融科技）嘅考試內容，例如AI、機器學習、算法交易、區塊鏈等。未來嘅考生唔可以淨係死背書，要與時並進咁話。但咁又會唔會令到一般合格率得四到五成嘅CFA，合格率再創新低呢？
余絲韻