絲絲講場：財圈過父親節孝心滿瀉

中民證券（香港）研究部董事黃偉豪（Ravi）分享，爸爸六月尾生日，一家人會喺父親節正日食飯兼慶祝生日。而本身係爸爸嘅Ravi，囝囝兩歲半唔識送禮物，但幾日前就收到太太送畀佢鬚刨同沖咖啡套裝當父親節禮物，夠晒驚喜同貼心。

黃集恩下廚氹兩老

而身懷絕頂廚藝嘅投資銀行上市衍生產品部主管黃集恩（Martin）就話，父親節會買餸煮飯畀兩老享用。去過英國留學嘅Martin，對點揀同點整海鮮甚有研究，之前整過一道雞蛋蒸蟹鉗，絲絲睇相都流晒口水！

麥嘉嘉送行山裝備

志昇証券研究部董事麥嘉嘉話，父親節會同爸爸食飯，而爸爸鍾意行山，所以會送行山裝備。佢仲話，雖然妹妹身處加拿大，但佢到時會夾啱時間，晚飯嗰陣同爸爸視像通話。

至於，身為三個女兒父親嘅資深物業投資者吳龍飛則透露，女兒們每年父親節都會一齊自製禮物畀佢。而父親節一家人會先到郊外踩單車、放風箏，然後夜晚就去食自助餐。

余絲韻