絲絲講場：花旗劉顯達為份工變筋肉人
花旗環球研究部董事總經理劉顯達（Pierre）掌管該行中港公用股研究團隊，工作幾吃力唔講都知，不時因為啲公司漏夜出通告搞到無覺瞓。但呢位忙到披星戴月嘅人竟然收埋一身肌肉，更被傳媒封為「中環郭富城」！但原來，如果唔係頸椎有事，Pierre都唔會做運動，遑論有今時今日。
Pierre話以前日日坐喺度對住部電腦十幾個鐘，一○年隻手成日痺，原來係頸椎壓住神經線。物理治療後總算好番，不過一三年又翻發，一六年病情惡化到要睇骨科，試過打止痛針，高峰期一星期食過百粒藥，「我心諗唔係路噃，咁搞法個肝遲早頂唔順！」
焗做運動醫職業病
之後Pierre去睇中醫，醫師有一日突然同佢講︰「劉生，你唔使再嚟睇啦，你得兩個選擇，一係你唔好再做依家呢種工，一係就去做運動，行氣活血等啲軟骨生番出嚟，墊住神經線就唔使壓住，咪唔會痛囉」。卒之前年四月開始，工餘時間拉吓筋，做咗一年後開始操肌，亦即係話，原來Pierre只係用咗年零就變成筋肉人！
咁家陣呢位咁fit嘅人，又點樣判斷一個人可唔可以跟佢搵食呢？Pierre話，俾得你見工其實公司已經知道你有基本知識，可以應付工作。真係見面時佢反而唔鍾意問點睇某隻股票，因為你有得做功課，反而會問好似「中美咁多矛盾，你係中方談判團團長，你會用咩策略」咁嘅問題。佢會從中睇你思考有無條理，識唔識舉一反三，會唔會提出合理嘅解決辦法。
余絲韻