絲絲講場：國產「獨角獸大王」另起爐灶
內地著名創投公司啟明創投主管合夥人甘劍平（JP Gan）證實將會喺今個月底正式離任，然後喺七月自立門戶。今年，佢已經連續第四年入選美國《福布斯》雜誌發布嘅全球最佳投資人榜，位列第5位。
甘劍平曾幫50初創上市
啟明創投目前管理資產總額超過40億美元，甘劍平一直擔任啟明創投主管合夥人及投資委員會成員。而經佢手喺紐交所、納斯達克、聯交所、上交所及深交所等上市嘅初創企業超過50家，其中就有20家屬獨角獸企業（估值10億美元以上嘅初創企業），因此，佢被內地創投基金業界稱為「獨角獸大王」。
話明係「獨角獸大王」梗係唔係浪得虛名喇！甘劍平投資過嘅明星獨角獸企業包括香港上市嘅小米集團（01810）、美圖公司（01357）、美團點評（03690）。美國上市嘅包括攜程網（CTRP）、世紀佳緣（DATE）、蘑菇街（MOGU）、Bilibili（BILI），以及大眾點評、知乎、螞蜂窩、摩拜單車、微醫、途虎、途家及挖財等。
點股成金賺143倍回報
回顧近廿年投資生涯，甘劍平投資最滿意嘅獨角獸企業原來係小米集團，亦都係佢投資最成功及回報最高嘅例子。舊年小米喺香港上市，為啟明創投帶嚟超過143倍回報。臨別秋波，甘劍平透露佢投資獨角獸企業會睇四大重點，即係一要睇市場，二要睇企業，三要睇團隊，四要睇估值。咦？甘生，啲秘笈似乎行貨咗啲喎！
余絲韻