絲絲講場：大白兔糖賣奶茶變炒籌！

手調飲品熱潮席捲全球，眼見內地多家手調飲品店開到通街都係，連大白兔呢個牛奶糖老字號都想分一杯羹，喺上海開咗間奶茶快閃店（Pop-up Store），用大白兔牛奶沖番七、八十後嘅童年回憶出嚟！

講番背景資料先，大白兔牛奶糖係上海冠生園食品出產嘅牛奶糖品牌，由六十年代開始陪伴唔少香港人成長。為咗慶祝今年公司成立六十周年，夥拍唔少品牌做跨界營銷，今次呢間奶茶快閃店就係其中一項。

唔好諗住區區一杯奶茶唔矜貴，當地好多人為咗呢種「回憶」排隊排足三粒鐘，但即使肯排都未必有籌，事關佢今次係採用近年內地電商慣用嘅「飢餓營銷」限量搶購方式，每日限量供應1,000杯，每人限購兩杯，賣晒就無o架啦！

不過，有錢的話，都有機會一嘗大白兔奶茶。話說有排到籌嘅人，即場用70至150蚊人仔一杯嘅價格兜售個籌，估唔到唔少人肯畀幾倍價錢去買，計番每杯賣19至23蚊人仔，個炒家都幾和味。炒到咁貴，味道又點呢？飲過嘅內地網民覺得同普通奶茶無分別，仲嫌佢甜咗啲。

余絲韻