絲絲講場：茅台以酒會友4500人逼爆股東會

絲絲發現茅台使出3大招！第一招係「息誘」，出動到史上最大規模嘅派息方案，派足182億人仔，已經喺股東會上通過方案。其實集團一向都大手筆，上市18年累計派息574億人仔，已經係當年上市集資額嘅28倍。

折扣價買到斷貨極品

第二招係優待「酒友」，股東可以用折扣價買到市面上成日斷貨嘅茅台，過足酒癮，尋日已經有1,900個人買到一箱飛天茅台同兩樽生肖酒。董事長李保芳仲話，飛天茅台短期唔會加價，因為依家一樽賣1,499蚊人仔，利潤已經夠和味。有酒飲又唔加價，李總真係識做。

第三招係「利誘」，個個入場都想知今個月初成立嘅茅台集團營銷公司，會唔會畀佢分走咗原本屬於股東嘅利潤。李總就大派定心丸，強調大股東唔會同小股東爭利益。成立營銷公司只係防止權力過度集中，佢實質係上市公司經銷商之一，同其他經銷商無分別，叫小股東放心咁話。

茅台股價尋日重越每股900蚊人仔關口，收報911.91元人仔，升2.69%，年內已經累升約55%。小股東今鋪飲多杯勝嘅，各位乾杯飲勝，喜氣洋洋，洋溢四方！

余絲韻