絲絲講場：華興眼光獨到 一樣畀過「學費」
外國有好多投資眼光準嘅勁人，但華人都唔差，好似內地投行華興資本（01911）旗下嘅私募股權基金，投資過唔少好出名嘅「獨角獸」企業，如滴滴出行、商湯科技等。聽落百發百中咁，不過集團首席營運官項威就話，「當然有投資過失敗嘅」。
不過，咁多年嚟，集團喺知識及數據上累積唔少「真功夫」，依家投資嘅眼光已經愈來愈準！
曾幫美團上市
好似舊年上市嘅同股不同權企業美團點評（03690），華興都有份幫佢上市！呢個咪成功案例囉！果然學識投資前，總要交吓學費嘅。
項威仲私人醒咗投資者幾個貼士，佢哋依家睇好「硬科技」，如5G及人工智能等企業，仲有生物製藥、金融基建等新經濟行業。至於O2O（線上到線下）、互聯網金融，同埋「聲稱能完全顛覆傳統商業模式」嘅新經濟模式，就要小心為上。
華興資本喺行內個朵唔係浪得虛名，就連上海證券交易所新設立嘅科創板，其中科技創新諮詢委員會委員都見到華興資本創辦人兼董事長包凡個名。
余絲韻