Market Insight：基建鐵路股只宜短炒

睇番昨日藍籌股走向，重磅股表現各異，其中騰訊控股（00700）升1.7%，建設銀行（00939）升1.1%，中國移動（00941）微升0.1%，滙豐控股（00005）則升0.5%，表現冇乜特別。反而升得最顯眼的，相信非內險及鐵路基建股莫屬。中國平安（02318）及中國人壽（02628）分別升2.3%及1.3%，而中國鐵建（01186）、中鐵（00390）及中交建（01800）升幅則介乎0.9至5%不等。

首季保費表現不俗

先講內險股，早前受惠市場憧憬阿爺放水撐經濟、A股反覆向上間接推動內險企業投資收益。昨日中國銀保監會公布的首季內險統計數據，正好印證內險經營環境唔錯，好似原保險保費收入按年增長15.9%至1.63萬億元人民幣，其中財產險及人身險保費收入分別按年增長7.3%及18%，正好作為推動股價再上的助力，故大家不妨揀隻心水內險炒一轉。

至於基建股方面，其實近期已經走晒樣，好似中鐵建、中鐵及中交建近兩個月都係反覆向下為主。這亦難怪，雖然市場一度憧憬中央會加大基建投資以支撐經濟，但等來等去仍是只聞樓梯響，未見有實際行動。

故此，昨日板塊回暖，主要係資金博季度業績出爐之餘，亦有可能是藉着上周在北京舉行的第二屆「一帶一路」國際合作高峰論壇期間，簽署了總額達640多億美元的合作協議，帶起板塊氣氛。不過，今轉明顯係借勢炒作居多，暫未見企業可以在短期內受惠，故除非上述三股的股價能上破20天線阻力，否則炒作最好點到即止。

油價回軟利航空股

此外，昨日一眾中資航空股又見起動，係咪同五一長假期多咗人外遊有關？非也，查實資金主要都係炒美國總統「侵侵」上周於推特貼文稱，已告知石油輸出國組織（OPEC）油價必須降下來，再出口術打壓國際油價，紐約期油隨即從66美元樓上，跌到落昨日曾見62.6美元，間接有利降低航空企業營運成本。

另外，即使美匯指數近期反覆抽上98水平，但在美息前景唔多明朗下，美元升得幾耐仍為疑問，一旦轉升為跌，同樣有利以人民幣作為收入的航空股。走勢上，昨日以中國國航（00753）彈力最勁，升咗3.8%，南航（01055）及東航（00670）就分別升2.8%及2.6%。由於三股下試中線升軌支持後均現反彈，短期再上機會唔細，值得揀番隻短炒，跌穿50天線即止蝕。

古勝