絲絲講場：美巨企出動AI捉伙記蛇王？
人工智能（AI）唔單止同人搶飯碗，原來更可以幫上司加強員工嘅工作效率。據報道，亞馬遜掌舵人貝索斯就利用AI揪出偷懶員工，市傳超過幾百名員工已中招！佢咁精明，難怪身家高達1,210億美元（約9,438億港元）。
呢個亞馬遜AI系統名為Time Off Task，可以統計員工嘅蛇王時間，其中倉務員就最易被捉到，只要員工隔一陣沒掃描包裹，機器就會開始計時，睇吓員工蛇王幾耐，甚至會自動發出警告。最恐怖嘅係，呢個系統追蹤員工嘅生產效率，完全唔會聽從人類嘅意見，直接話炒人就炒，無情講！早前就有消息指有超過900個亞馬遜員工因AI嘅評定而被炒魷。
沃爾瑪聽聲測收銀效率
不過，亞馬遜就話AI系統只係輔助員工做事，唔會炒任何人。係真定假就沒人知啦！
𥄫實有無員工偷懶，又可止亞馬遜一家企業。根據統計機構Gartner喺二○一八年進行嘅調查顯示，全球各行各業嘅組織當中，有22%會記錄員工嘅活動數據，17%監控員工使用嘅電腦數據。
除亞馬遜外，波士頓嘅創業公司Humanyze生產一種可穿戴徽章，配備咪同藍牙等傳感器，咪可以收集音頻數據，加速度計可以確定員工係坐緊定企緊，仲有藍牙同射頻識別技術（RFID）嚟追蹤員工位置以及佢哋係咪有面對面互動。
超市巨企沃爾瑪亦對收銀員開發咗一種監控系統，能根據包裝袋嘅聲音同掃描條形碼嘅速度，嚟推測收銀員係咪高效工作。而內地嘅富士康工廠就利用視頻攝像頭，嚟判別生產線工人係認真工作定偷懶。
余絲韻