Market Insight：炒國策股小注無妨

大市偏靜，藍籌股當然無氣無力，股王騰訊（00700）就最明顯，上周股價高低位分別為398.4元及385元，重點係講緊「全周波幅」，可想而知願意落場玩的大戶有幾多。

此外，最鍾意無風起浪的美國總統「侵侵」，近期明顯較為收斂。咁又難怪，一方面聯儲局已聽咗佢支笛，由鷹轉鴿，市場預期美息從升轉跌機會增加。既然目的已達，亦無謂再多生事端。

擬重推補貼政策

更重要係，明年就係總統大選，即使早前有意話開多條歐美貿易戰線，但大選前「穩經濟」重於一切，相信早前舉動都係靠嚇居多。所以，在同樣無再加大相關言論力度下，咁投資市場自然亦少啲波動。不過，美國同伊朗再起衝突，油價勢Chok，風險不得不防。

反之，近期內地公布的首季經濟數據向好之餘，資金亦開始追炒落後股或國策股，故不妨從中揀選目標。國家發改委內部《徵求意見稿》計劃提供家電及手機補貼，藉此刺激消費，海信家電（00921）、創維數碼（00751）、TCL電子（01070）及海爾電器（01169）股價上周四均報升收市，值得望多兩眼。

從經濟數據顯示，內地經濟正從底谷回升，中央主力推動內需消費以刺激經濟。至於近日發改委發布關於《推動汽車、家電、消費電子產品更新消費及促進循環經濟發展實施方案（一九至二○年）（徵求意見稿）》，亦與市場早前預期相符。

不過，投資者需要留意未來推行之國策細節，如地方政府參與度、實際補貼資金規模等，皆為板塊往後能否熱炒的主要因素，事關這些政策憧憬其實年初已炒過一轉，並成功推動板塊反彈，但若然最終結果不似預期，相關股份隨時開倒車，故追勢買唔係唔得，但必須小心控制注碼。

中移暫時掂唔過

最後要注意恒指近期雖然在三萬點水平徘徊，但正好用來睇清藍籌股的強弱。好似隻中國移動（00941），三月時市場主力炒作能間接受惠5G概念，若然冇趁機食胡，今次又中招。該股自三月二十一日高位87.7元，跌到落上周四收報75.7元，累跌13%，同期明顯跑輸大市，若然高位追貨都咪話唔傷。

中移同中國人壽（02628）一向難炒，後者經歷一輪反彈後，近期走勢轉為橫行，表現明顯優於中移。加上市傳美國隨時以「受到國家安全威脅」的理由，反對中移提供美國對外通訊服務，咁集團會唔會又成為下一個中美博弈的受害者？機會確實不容抹殺，短期都係掂唔過。

古勝