作為蘋果公司（Apple Inc.）嘅行政總裁，庫克又點可以唔學「教主」喬布斯咁，出番本傳記呢？今日絲絲就向你推介呢一本《Tim Cook：The Genius Who Took Apple To the Next Level》（庫克：將Apple推向更高層次的天才）！
庫克推出第一本傳記，陣容當然唔嘢小，由曾經為Apple首席設計總監艾維（Jonathan Ive）傳記執筆嘅Leander Kahney再度出手。各大外媒亦都爭相為呢本傳記出書評或者讀後感，其中，有人話呢本書好似讚美緊上帝咁。
嗱！絲絲唔係吹水，個作者話庫克接管Apple至今，待人更平等，係一個更安靜嘅天才，又話佢比起形象，更加重視生產同埋供應鏈狀況。講到咁，唔通係暗寸……
講番本書嘅內容先啦，又唔係淨係得讚嘅，中間仲夾雜唔少庫克工作上嘅小故事。例如，Apple發展初期，當時仲係Apple首席營運總監嘅庫克出席商討亞洲市場嘅會議時，佢坦言中國市場唔多掂，要派人去當地解決。30分鐘後，佢見到某位核心管理高層仲喺公司，就即時問「點解你仲喺度？」吓？原來庫克嘅效率要求咁高！
之不過，話明係傳記，讀者梗係最想知道關於庫克嘅私事啦！尤其佢係當今世上最引人注目嘅同性戀CEO。
可惜，今次呢本傳記完全無提過私人感情，大家惟有再等下一本啦！
余絲韻