絲絲講場：扭蛋玩具扭出驚人商機
如果問玩具商趙志雄「乜嘢玩具最好賺？」佢必然會答「非扭蛋玩具莫屬」。事實上，美國係港商最大嘅出口市場，趙志雄透露，淨係美國嘅扭蛋玩具訂單就佔整體七成，其次係墨西哥。
研寵物科技玩具吸客
佢話，扭蛋玩具每個月出貨量價值百幾萬元，相當於約七至八個貨櫃，基本上生意好穩定。相比其他低成本嘅玩具如吊飾，扭蛋係更受歐美買家歡迎，批量更多，尤其係特定主題電影上映嗰陣，相關玩具銷量就會大幅提高。
但受貿戰影響，扭蛋玩具現時出貨量降至每月一個貨櫃，睇怕要等和解後，生意先會回復正常。
講開扭蛋，原來佢係源自美國！起初扭蛋機放嘅唔係各種玩具公仔，而係零食、香口膠等食品。直到上世紀六十年代，美國扭蛋文化先傳到日本，後來，因為考慮到糖果放喺機裏頭嘅衞生問題，先開始出現塑膠蛋殼，漸漸演變成今日嘅樣式。
除咗扭蛋玩具，仲會睇好咩玩具嘅出口前景？趙志雄話，係新科技寵物玩具，現時部分廠商正研發緊具藥性嘅無毒塑膠寵物玩具，能夠檢查寵物嘅健康等，相信呢類玩具可以吸引買家。
余絲韻