絲絲講場：貝索斯分享成功12秘訣
「成功」呢兩個字，每個人都有唔同嘅定義，但對於世界首富兼亞馬遜創辦人貝索斯嚟講，意義就更加深遠。佢曾多次喺公開場合分享自己對長壽、幸福同成功嘅生活秘訣，例如一○年喺美國著名學府普林斯頓大學畢業典禮上面，發表咗一場名為「選擇塑造人生（We Are What We Choose）」嘅演講，強調天賦同選擇之間嘅區別。
天賦Vs選擇 影響前途
佢提到：「聰明係一種天賦，而善良係一種選擇。如果稍有不慎，就可能畀天賦誘惑，損害咗你嘅選擇。」佢又話，無論變得幾成功都好，事後睇番，你最Care嘅唔係銀行戶口入面有幾多錢，而係你為咗達到目標所作出嘅選擇。
貝索斯舉例，話最初提出創辦網上書店（即後來發展成人人皆知嘅亞馬遜）嗰陣，佢知道係一個非常冒險嘅舉動，甚至向老闆尋求建議。後來佢老闆回應，「聽落係一個好主意」，但如果貝索斯當時無一份好工作，咁「將會係一個更好嘅主意」。
受到老闆嘅啟發，貝索斯就陷入兩難嘅局面，佢坦言：「雖然呢個係艱難嘅抉擇，但最終都決定試一試。我唔認為自己會後悔，甚至失敗，亦唔希望因為唔敢去嘗試而被困擾。因此最終選擇一條唔太平坦嘅道路，跟隨自己嘅心意，事實證明我為自己嘅選擇感到自豪。」
余絲韻