絲絲講場：周黑鴨撈過界內外都要辣！

佢月前撈過界同韓國化妝品牌Missha（謎尚）推出周黑鴨限定彩妝禮盒，入面有唇膏、眼影同BB霜。以後食辣鴨辣到嘴仔紅晒，即刻搽唇膏滋潤吓，化番個妝等你內外都一樣咁「辣」！

夥韓品牌出化妝品

周黑鴨拓展業務加入彩妝界，合作方嘅Missha就話，跨界合作可以帶嚟更多樣化、更有新意嘅品牌角色同產品體驗。公司亦睇準依家後生女心態：貪靚又為食！

由今年二月開始，周黑鴨已不斷喺微博宣傳呢款同名彩妝禮盒，禮盒包裝以鮮黃色為主，面頭有大大個化咗妝嘅周黑鴨Logo，少咗麻辣嘅感覺，多咗可愛少女味，唔少網友讚設計得意。

今次Missha夥拍周黑鴨，內地網民講笑話：「化最精緻嘅妝，吃最辣嘅鴨脖」，畫面似乎搞笑咗啲喎！

余絲韻