絲絲講場：小米雷軍年袋近百億

話說小米尋日出年報，入面就披露執行董事雷軍、林斌，同埋非執行董事許達來、劉芹等人，雖然無董事袍金、無薪金、無酌情花紅等，但咪以為佢哋白做唔使出糧，因年報又寫到明，公司有五名最高薪酬人士，雖然唔知道係唔係上面嗰幾位，但佢哋「以股份為基礎的薪酬開支」就達到102.08億元人民幣！

公司純利僅135億

其實，公司喺去年四月二日，就向雷軍及其家屬為受益人信託持有其權益嘅公司發行大筆B類普通股，作為對雷軍所作貢獻嘅回報，確認為98.27億元人民幣、以股份為基礎嘅薪酬開支。咁即係其餘四位最高薪員工，就分咗餘下4億元人民幣嘅股份薪酬喇。

話時話，小米去年純利都係得135.53億元人民幣，幾位高管值唔值咁高人工，就交畀股東們去深思。

余絲韻