絲絲講場：中銀賣百元紀念鈔每張賺$125
中國銀行（香港）（02388）二○一七年慶祝百年華誕，一共發行500萬張紀念鈔，張張面值100蚊，最貴嗰套嘅整版三十連張，每套賣成萬四蚊添。佢哋昨日公布，呢批紀念鈔有成6.27億元收益，計落即每張賺125蚊。
睇番一五年滙豐銀行慶祝150歲生日，嗰時都發行咗200萬張、面值150元嘅紀念鈔，當時出售紀念鈔嘅收益有4.77億元，除番開每張賺成238蚊喎，平均利潤比中銀香港高近一倍。
然而，銀行發行紀念鈔一向都唔係為賺錢，滙豐當年將所有收益拎晒做善事，今次中銀香港都話，會將收益全數用作本地公益慈善用途，雖然無助盈利表現，但係變相幫各位小股東做善事，都值得開心嘅。
熱潮過後有價無市
時至今日，以上銀行所發行嘅紀念鈔票，又炒唔炒得起？錢幣公司嘅負責人話，現時已冇市場，更跌破發行價，好似中銀紀念單鈔依家只值150元，比發行價跌近5成。佢指，由於中銀紀念鈔發行過量，且銀行標價過高，連原先嘅炒賣空間都賺埋，導致現時有價無市。
佢又話，雖然滙豐發行少過中銀一半有多，但係以內地炒家為主嘅紀念鈔炒賣市場，始終鍾意國有銀行，所以香港滙豐銀行紀念鈔都一樣炒燶！
余絲韻