Market Insight：教育股可跟勢短炒

從技術走勢睇，恒指已先後上破由去年高位33,484點回落至十月低位24,540點之反彈黃金比率0.236（26,651點）、0.382（27,957點）以及0.5（29,012點），未來能否上破及企穩0.618（30,067點）將成後市能否再上關鍵，炒指數者記緊睇位搵食！

如果睇埋外圍，環球投資市場就更顯歌舞昇平，好似美股道指已升到兩萬六水平，滬綜指亦上破三月營造的橫行區阻力，牌面睇三千關已由「阻力變支持」。

中資航空股追落後

唔單止股市，就連虛擬貨幣亦升到唔講得笑。比特幣自四月開始由4,100美元水平，一度抽到上周見5,200美元水平。其他資產方面，紐約期油亦叫做企番穩60美元樓上，美國十年期國債孳息率由早前低位2.3厘彈番上去，睇落資金已經將早前美債長短債孳息倒掛引起的衰退憂慮拋諸腦後。當然，看官可能會問，環球經濟真係形勢大好？古勝無水晶球，既然市場今期吹「東風」，咁順勢而為就包冇錯！

早前講到可留意落後板塊，結果上周四分別有兩個板塊跑出，就係中資航空股及教育股。受惠於國務院常務會議決定，今年降低政府收費和經營服務性收費措施，其中民航發展基金徵收標準降低一半，消息刺激東航（00670）、南航（01055）及中國國航（00753）上周四分別升3.9%、3.7%及3.3%。

多間大行隨即發表報告唱好，中金指措施將減少航空公司成本，預計會顯著增加企業淨利潤；美銀美林則認為現價尚未反映復甦因素，對中資航空股的「買入」看法更確定，上調板塊盈利預測及目標價；至於摩根士丹利則預期三大航空股未來十五日將跑贏國指。

不過，留意到三大航空股今浪其實累升不少，從年初至今已分別累升89%、59%及51%，且見上周四即市升幅收窄，暗示資金再高追意欲唔大。所以就算中線前景有幾好，只宜趁低吸納，高追可免則免。

致力推動產教融合

另一方面，國家提出就實施中國特色高水平高職學校和專業建設計劃作出部署，加上國務院決定產教融合試點企業興辦職業教育符合條件的投資，將按投資額30%抵免當年應繳教育費附加的政策，並帶動睿見教育（06068）、宇華教育（06169）、楓葉教育（01317）及新高教（02001）等升幅介乎4至6.7%。

以圖論勢，楓葉教育剛剛破位而上最值博，可順勢跟進，目標價4.6元不難達到，跌穿4元止蝕。若想追落後，則可揀剛上破降軌阻力的新高教，目標睇5元，止蝕位3.6元。

古勝