Market Insight：具業績支持內房續強勢

今日為期指結算，周五亦係季結，既然個市無主題，橫睇豎點港股都仲係反覆市為主。既然指數無定向，增加資金繼續炒股不炒市的取態。

物管股鑊氣未減

故此，古勝早前提過鑊氣唔錯的物業管理股，留意到部分股份依然有運行，當中包括中海物業（02669）、新城悅（01755）及永升生活（01995）股價均破頂，至於彩生活（01778）及奧園健康生活（03662）亦升9%及4.7%，睇落板塊鑊氣真係唔錯吓，不妨定好止蝕位，揀番隻物管股短炒吓。

此外，內房股亦有再展升浪的迹象，今次上升動力主要來自業績公布去年的佳績所支持。近期多隻內房股公布的業績均表現不俗，如時代中國（01233）全年多賺64.9%兼派息慷慨；旭輝控股（00884）去年多賺12%。

至於一線內房方面，華潤置地（01109）及中國海外（00688）去年核心淨利潤分別按年增長17.8%及8.3%，世茂房地產（00813）亦公布按年多賺12.6%，並派發末期息0.7元，全年合共派息1.2元，按年上升兩成。既然內房板塊業績交足功課，再加上內地整體樓市有回暖迹象，難怪多隻內房股股價表現有起色。

部署方面，考慮到中美貿易談判未有突破發展，相信中央政府會着力令到房地產市場穩定，以減低經濟下行的風險。加上行業估值其實唔算貴，現價追入仍然有一定值博率。

當然，古勝堅持如要買內房股，一定係買大唔買細。一來資產質素有保證，二來假如次季人行再度降準，又或局部放寬樓市調控措施，始終有分量的內房發展商最先受惠，其中可吼中海及潤地，兩者往績市盈率分別約7倍及8倍，尚算吸引，中海首站目標睇前高位30.8元，跌穿27.3元止蝕；潤地早前破位而上，短期只要守穩31元仍可吸納，上望35元。

油服股短炒為宜

另外，近日市場憂慮石油供應緊張，紐約期油一度上破60美元，「三桶油」中以中海油（00883）表現最標青。一眾油田服務股亦做好，如海隆控股（01623）、宏華集團（00196）及中海油田服務（02883）都發力向上。

但要留意，外圍其實仲係驚緊環球經濟可能步入衰退，自然影響對未來原油的需求，相信油價上升空間有限，其中油服股會較為波動，如果追勢買就更加要小心，總之短炒可以，但並唔係坐貨對象！

古勝