絲絲講場：軟銀差一步做到亞馬遜話事人

當年收購差少少銀両

孫正義日前喺東京Milken Institute會議想當年，話佢嗰時同亞馬遜創辦人貝索斯商討收購亞馬遜30%股份，都就快傾得成單刁，點知貝索斯企硬要1.3億美元先肯賣。孫生點會唔明亞馬遜係值呢個價，但可惜唔夠銀両，淨係出到1億美元，咁就白白走寶。

佢最近撞番貝索斯，講起當年佢錯失投資，兩人都得啖笑。孫正義承認當年無達成交易係好大嘅錯誤，但今日睇番轉頭，起碼證明到自己眼光係無錯。

咁究竟孫正義呢個錯有幾貴？截至周二，亞馬遜市值已高達8,762億美元，意味當年如果佢買入呢30%股權，依家價值已經超過2,600億美元。

孫生因為亞馬遜嘅教訓，唔想再犯同樣嘅錯，所以要準備好充足嘅資金。所以兩年幾前，佢就成立咗規模1,000億美元嘅軟銀願景基金，留彈藥第時收購。

余絲韻