Market Insight：金礦股中線具值博率

之前古勝講過，恒指只要守穩29,000點及29,200點，急挫機會唔大，可惜昨日已跌穿第一個支持位。再睇埋騰訊去年全年業績，錄得股東應佔盈利787.19億元人民幣，按年僅升10%，單計第四季，股東應佔盈利142.29億元人民幣，按年大減32%，遠差過市場預期。

淡友隨時乘勢反擊

故此，業績公布後，騰訊在德國法蘭克福交易的歐洲預託證券股價急挫。淡友今日好大機會乘勝追擊，恒指兩萬九關隨時不保。

雖然騰訊今日表現如何不得而知，但美國加息周期似乎完結就係鐵一般事實。點陣圖預示美國年內不會加息外，同時宣布九月停止縮表，市場更開始估計年尾有機會減息。從利率期貨市場反映，今年底聯儲局減息0.25厘機會率有近三成。

講真，中美貿易戰拖得愈耐，對美國經濟損害愈大。雖然話美國總統「侵侵」要顧及鋪路連任，此前經濟斷估唔會太差。但凡事總有例外，如果今次環球經濟畀中美貿易戰拖垮，後果真係不敢想像，惟有寄望兩國唔會玩大咗收唔到科。

受美息前景影響，美匯指數跌返96樓下，美國十年期國債孳息率落番去2.512厘。商品市場今期最威水，紐約期油升上60.12美元，金價反覆向上，最高見1,320.6美元，都咪話唔勁！

環球經濟埋下隱憂

細心諗，如果聯儲局委員唔係睇到啲市場未發現的潛在不利因素，無理由會暗示年內唔加息（去年十二月仲講緊今年加兩次息），所以美國經濟增長放緩機會唔細。金價受惠美元回軟及避險需求上升兩大因素，中線前景確係可以看高一線！

昨日一眾金礦股逆市呈強，其中紫金礦業（02899）、招金礦業（01818）及山東黃金（01787）分別升5.5%、4.8%及3.4%，三者中以紫金走勢最好，剛上破短期降軌阻力。由於昨日先係第一支大陽燭，相信仲有得去，首站目標前高位3.57元，中線博見4元亦唔過分，止蝕位3.2元。

古勝