香港人到底有幾鍾意碌卡？信貸資料庫環聯最近嘅數據話，原來舊年第四季信用卡貸款創新高，按年上升5%到1,360億元，而俗稱Z世代（95年或之後出生）嘅24歲或以下嘅年輕人，踏入社會成為「碌卡一族」，就成為信用卡貸款增長最快嘅一群！
呢批95後年輕人，舊年信用卡應繳款項總額已經超過15億元，按年增幅高達89%。相反，經濟能力較穩定、24至39歲嘅年齡群應繳款項增幅只有17.7%，55歲以上人士更有減少迹象。
原來香港人平均持有超過5張信用卡，高於美國人均不足3張嘅水平，其中以飛行里數兌換計劃為賣點嘅信用卡，最受高消費客戶及年輕人歡迎，而呢一類信用卡嘅消費總額，足足高過普通信用卡8倍。
絲絲每次碌卡後最驚就係唔記得找卡數，不過環聯香港研究及顧問部總監劉俊傑就話，雖然香港信貸市場持續增長，不過一般消費者信貸產品嘅違約率，仍然處於低水平，睇嚟大多數香港人都識得管理個人財務！
余絲韻
