周三港股成交開始縮減至千億樓下，昨日都係得960億元，滬綜指亦再失守三千點關，加上美國總統「侵侵」又轉口風話唔急住簽貿易協議，在內憂外患下，市場由晴轉陰。恒指即市飄忽不定，最終升43點報28,851點，雖仍企穩20天線之上，但短期再上有一定難度。
恒指本周無法寸進，連帶早前升得唔錯的板塊都要回調，其中最明顯係隨A股向下的中資券商股。中信證券（06030）、中國銀河（06881）、HTSC（06886）以及中金公司（03908）等近日都反覆向下，普遍跌到落主要支持位水平，短期如果再落，跌勢有機會加速。
當然，如果純睇利好因素，如中美幣策轉鬆，市場資金充足、MSCI增A股比重等均支持市場短期氣氛。然而要留意的是，市場有錢都未必一定要喺現水平高追，講到尾都係睇估值同資金流向。故持有中資券商股重貨者，建議到價必須嚴格執行止蝕/止賺，以免貪字得個貧。
另外，美國上周原油庫存大減，刺激國際油價向上，紐約期油昨進一步抽上58.6美元。港股的「三桶油」亦跟住上，惟尾市升幅收窄，中海油（00883）、中石油（00857）及中石化（00386）升幅介乎0.1至3.7%。至於油服股上升動力較大，安東油服（03337）、中海油服（02883）及宏華集團（00196）均有不俗進帳。
值得留意，石油股今轉相對大市升浪唔算跟得好足，始終環球經濟增長已有放緩迹象，加上今次油價反彈主要受美國庫存減少、油組持續執行減產、委內瑞拉原油出口因電力中斷受影響等，故中線能否再升實在好成疑問。
故此，無論「三桶油」定油服股，只建議短炒為主，其中宜以中海油作主打。該股昨收報13.76元，已升至中期阻力位14元水平，後市只要在成交配合下突破，目標至少睇15.5元，止蝕訂13.5元。
古勝