絲絲講場：貿發局搞Gag教港商食海參

原來海參係當地特產，不過就唔似華人會生曬，而係加工成副產品再賣。Louis話，當地人鍾意提煉海參精華，整成海參蜜糖、海參面膜、海參保健品等。幫大家由內至外補身。

有稅務優惠 避貿戰一流

除咗海參，Louis透露，俄羅斯遠東地區天然資源仲好豐富、土地充足、基礎建設提升，加上入埋歐亞經濟聯盟，當地政府提供稅務優惠，係好吸引嘅製造業投資熱點。家陣正值中美貿易關係緊張，Louis建議港商不妨將業務拓展至新市場喎！

尋日研究總監關家明同台於該局季度出口指數發布會上，講開中美貿戰，佢亦預期兩國爭議未能即時解決，美國總統大選等不穩定因素仍存在，港商情緒難免有上落。雖首季出口指數按季反彈4點至39.2，下季好大機會仍處盛衰分界線50以下，但相信唔會重現去年第三季單季急挫19點慘況。

佢仲預警話，本港一月出口貨值按年跌0.4%，連跌三個月。因今年農曆新年比以前早，二月工作日數少，基數效應或導致出口數字「幾驚嚇」。

不過關家明亦大派定心丸，話唔使太驚，因貿易氣氛同前景已好過之前， 一月出口佔全年比例唔大，就算首季出口跌，對全年預測影響唔大。貿發局亦繼續維持今年出口增長預測不變，出口貨值升5%，出口貨量升3%添！

余絲韻